The Poet's Library

زمان الغمة

شفَت ؤعييت ؤمليت ف زمان لعجب

ؤ صبر دبرو صبري ، ؤزاد في عْيايا

شبعت خبيط من الهم ولغم لمشعب

والصورة ؤلخيال تاهت ف قاع لمرايا

فيا زهري، مالك غريب وحيد معذب

ؤذاك السعد عاد بين نياب لحظ شقايا

زاد ذبولي ؤتطفى نوري ؤ تألم القلب

ؤكوى لحال ب حر لْكية رجاي ومنايا

لصدور عادت ك السدرة شوكها مخلب

ؤغدا طعنة لغدر تجي ؤ تسقيك رزايا

رجع لحال حزين ضرير سقيم ؤمقلب

قالوا هاذ لمريض لموسوس ابو البلايا

وأنا ك الكَاعة ... لكن شر الذياب غلب

سلب مني لهنا ؤ غاب لي سمع شكايا

بنادم أصبح ذيب راسو بالحجر مزرب

لقلب بالخوف عامر ، والخيبة والرزايا

ما بق عل من تعول ، غ لخش وشطب

ؤ بعد من قوم بلابلا، راهم غير جلايا

لبس قدك يواتيك ، ؤ في ربك ارغب

يسكد ايامك ،يهنيك من جراح الجاية

وليوم ثقل لهم ودلو لمحنة ساح جْرب

ثَمُر الشر ، ؤ شدني من هزلي وعرايا

لمحبة الناقصة سهمو ، ؤ لخير حطب

يلوحك ، ؤ نهار تحتاجو ينسى لعناية

ب دعا توجهت لك ربي ولقلب نضب

نور دربي ، جبر هرسي، فأنت مولايا

يكفي م شفَت ؤريت من زمان لعجب

فرا الصبر هد صبري،هد فرحي وهنايا