The Poet's Library

صْحا

صْحا

ؤ على الطمع وحب لكرسي...

تْنَحى

راك عدتي شوكة في لحلق

نهب نهب خطف ؤ سرق

علقة وليتي وبَحة

بين نياب رْحى

طحنتي لحلم

زدتيه يأس وهم

قليل الدين ؤ مكرو سبحة

آ صحا

انا ما حطتك تما

غ باش يذوب لفقر ولغمة

تقاد حال لبلاد امن ؤ رحمة

ساعة عجبك لمقام

السلطة ولمال ؤ لحرام

يد تذبح ؤ يد شادة السبحة

بسبابك ضاعوا لولاد

هاجروا ؤ غابوا ولاد لجواد

شتتي لعشاش...

مسحتي الخير مسحة

آصحا

ذاك لمال راه مال العام

ما هو ليك فرسا وشد لْجام

قنع فغدا تطير ؤ تمحى

زرع المحبة ؤ دير لخير

م تغش م تميز خاف ربي لكبير

م تكون عقرب م تكون بوصيحة

فلولا ذاك لمزلوط ولكادح

م تسوى فمال وجهك قاسح

هما سباب الهمة والربحة

لفقراء لي هزوا لعلام

ناضلوا ؤحرروا لبلاد من لغمام

حاشا يقيسهم عليل تهميش ؤزدحة

آ صْحا

غدا كما هنتي لخلق تهان

خْدم لعام ؤ علي لعلام ي فلان

لا تكون ظلام يشهد الزور جبان

بالمعقول لأمم زادت وحمات لإنسان

ؤ بقيتي ملفوف في الزيرو جلفة

آصْحا

راه طريقك حفاري وبهوت

جامع طاوي ظان زمانك ما يفوت

في الظلمة غ مكَدم ...

فهو الله يمهل فتسنى الزدحة