The Poet's Library

لا تحكم

لا تحكم....

عْلَ لْخَلق بِ لْباطل وَلِ وَضْعو تْفَهًم

قالوا شّكْوة بلا مجهود ما تمخض

ؤم تعطي لا لبن ؤ لا سمن

لَخْوى ما يركب منطوقك

بَرْزانة ولْحَكمة ستر عيوبك

صفي الحَب من الخش والتبن

ما تكون للجماعة كَاعة

محبة لبهوت تسالي ف ساعة

أولا وسط مطمورة حناشها...

ما تنفث غير الشر والسم

ذيك لِ في سلة وحدة جمعت الصفا

وبِ ناب لغدر تعض لوفا

ؤ تمسخ بجلايلو لعفن

لا تحكم ...

فالغايب حجتو معاه

بدعاوي لخير تسناه

م تسمع للقيل بو ودينة مدندن

ناس حال ؤ أحوال

م تلوم حد لحظ جف ؤ ثقال

م تْحَكّر فيه ؤ م تكثر سؤال

ؤ على قول الزور لا تبصم

تولي قليل الشان مريض محقار

تابع مسلوب لسانو ضر مشرار

ما يحس بالغير يْخاف م يحشم

عنداك تدير القيل حلقة في ودنيك

ؤ ما تقيس بضرك لمحبة...

را حرها يتقلب عليك

غدا ما تنفعك حسرة ؤما يفيدك ندم

لا تظلم بنادم و ثقل عليه ب الردم

يشغل صبرو نار ؤم تقدر تطفيه

راك على جناح الجهالة حاط رجليك

ساهل للطيحة والحملة تببلعك وتديك

شد الأرض ؤ تقاد وخمم

كون إبرة لا تكون خيط

يديروا منك معبر او حَيْط

ؤ ف زمان التلفة وبلا بلا ...

يَصنعوا منك بوط مْصَنن

لا تحكم