The Poet's Library

لا علاقة

لا علاقة...

بين واحد مقاد نقي

صافي نقرة بالرضا مسقي

ؤ واحد مجلي مولف الزندقة

الحك ما طاح ما لقى غطاه

ما كاينة نية مع ل ربي عماه

ما يعرف قيمة صفا...

ولا وفا ولا صداقة

نار المكر حراقة

كَدات في لكشوش

عشق معفن مغشوش

بالتنوعير ولغدر مرشوش

عوج من لاول ...

التشلهيب ولحداقة

مطور للحال فهامتو محال

دجال عامر تخلويض عضال

سقى الروح بسمومو...

وكملها بالهرطقة

لا علاقة

تجمع في حسابك لملقط ولأصيل

ل تابع لحديد الريال وزهو الليل

عشرة ساعة ولوح لخاوي

جثة ميتة عامرة تلاوي

لحيالة ولكذوب ولحداقة

لغربان ذبحوا غنى لحمام

داسوا كل فرحة وأمان لئام

قطعوا لخير جلواقة

ولفوا دروب لخزية

النكير والسنطيحة فرية

باعوا لحمهم على طابلة المراقة

لعزة تباعت بصورة

هندام وزواق الصفة مبتورة

التشلهيب ...

وب الرخا تباع حيت سلعة ناقصة فاقة

لا علاقة

بين لبغل ولعود

لفم لمحلول والمسدود

ل خاصو لجام وعلاقة

بل بين الخردة تلاح وغرق

عاد مرحاض متنقل مصرفق

مستعمل ...

لا شان لا نقا لا رفاقة

لا علاقة