The Poet's Library

عَنْداكْ تْعودْ

لِ ذيكْ لْعَرْقُوبْ

بَظْفارْها خَْبشَتْ لَمْرايا

نَدْبَتْ لْقَلْب وَزادَتْ. لَخْدودْ

مَخْلوقْ كَنُودْ

مَا يَسْوَى وْقِيًة

مْخَلْوَضْ عَامِرْ تْفَلْيَة

سَرًجْ عَوْدَكْ وَسَيْفَكْ يْلالي ...

وَبَ لْحَقْ قَطّعْ ذيل لَحْنَشْ لْمَرْعُودْ

لا حَشْمَة لا جُودْ

لْغَا رْمَاحْ وَبارُودْ

حتًَى الطيبَة وَلَوْفا ...

جْلَاهُمْ نَكًارْ بْلا ْحدودْ

كَانْ مَوْؤودْ

تَلْفاتُو دُنْيا وَزْطَمْ

نْسَى اَصْلو وَما نَْدمْ

مَخْبُوطْ مْسَالِي وَلْمُخْ مَسْدُودْ

عَنْداكْ تْعُودْ

لِ ذِيكْ لِ نَكْرَتْ طْعامْ وَلْمَلَحْ

رَدًتْ لْعَشْرَة رْمَادْ وَصْبَرْ تَكْرَحْ

نْسَى وَتْناسَى...

فَ رَزْقَكْ مَكْتوبْ مَوْعُودْ

نًاسْ أَ صاحْبِي مَعَادِنْ

هَا صًادْقِينْ هَا لَمْلاعِنْ

ها لْغَالِي وَهَا رْخِيصْ وَهَا لْمَنْبُوذ

دْوًاخَلْ بَلَبْهُوتْ تْصَدًاتْ وَبْلاتْ

عَقْرَبْ وَعْلَى نْقًا تْلَوًاتْ

مَرْغَتْ لْخِيرْ في شْرُورْها ...

لذَاكْ لْعَهْد وَلَوْعُودْ

بْلامَا تْعُودْ

حْجَارْهَا تْشَدْهَا

لْخَيْر فِي لَبْعَادْ لا قُرْبْها

لُوحْ لَمْعَنْطَط ْ...

وَشُوفْ زَريعَةْ لَهْنا وَلْجُودْ

لِ بَاعَكْ سَدْ عْليهْ وَخْوِي

حَتًى لْذِيكْ لْكَبْدَة شْوِي وَكْوِي

لا تَحْزَنْ لا تْأَلًمْ ...

فَمُولْ لْجُودْ بَالرًحْمَة دَابَا يْجُودْ

عَنْداكْ تْعُودْ

فَعَنْداكْ تَغْرِيكْ لْجُثًة لْهَابْطَة

وَعنْدَاكْ تْفَرًطْ في وْصِيًةْ لَجْدُودْ