The Poet's Courtyard

ْوْجَه الطَرًاح

مَنْ وْجُوهْ الدًفْلى طَارِتْ لْحَشْمَة ...

لَحْيا وَصْفَا وَ نْقا ؤُ لَوْقََر

لاَ صْغِير تَسْقاتْ بالخير اخْلاقُو....

ؤُ لَكْبير فِ الكَرْكَاعْ تْلَفْ ؤُ هْتَر

وْجَه الطَرًاح كْحَلْ نَبًاحْ...

سَلَعْتُو حْيالة ؤُ غْدَر

سوق النورْ عْمَرْ بَوْجُوه الخِيبَة

مَصُوا عْرَقْ لْكادِحْ ...

ؤُ ردوا الصبر دْبَرْ

وْجَهْ الطَرًاح عَنْدْ لْحَزًة تَلْقاه ...

شَكًايْ نَوًاحْ مْقَصْدَر

ؤُ حَتًى إلَى حْسَنْتِ لِيهْ ...

نْهَارْ يَتْقَالْ جْناحُو يَنْسى ويَنْكُر

فَاَهْ مَنًكْ يَ زْمَانْ لْخيبة اَه...

بْنادِم فيكْ غْطَسْ فِ لْقُبح وَالشًر

ؤُ بِ لْعقلية لََمْدَنْسَة تالف غادي

ؤ بْلا مخ قَاسْ لْحَرف وَطُهر

النًفْس ماتَتْ وَالهَمًة شَاطَت ...

والفاسد بْلا حَشْمَة عَرْبَدْ بَجْهَر

فَهَوَ مَنْ وْجُوهْ الدًفْلى...

والدفلى طَعَمْها لا تنسى عَلْقَمْ مُرْ

الكذاب عادْ يَتْباهى بَكْذُوبو...

زْعَمْ ، ؤُ بْغَا يَطْنَز عْلى الطير الحُر

عَجْبوا وَجْهو ؤُ خْيالو

ؤُ م شاف عَقْلو المَخْدوشْ...

الناقص نْظَرْ

وجه الطراح داق الخير

جوًعْ خوه ؤ عَشًا لغير

م حْمَدْ الله م شْكَر...

تْرامى على حَق خُوه ..

وفي الملجأ سكًنْ مُو ؤ بُوه

لموضة والمساحيق ؤُ عُيًاد لْمَظْهَر

من وجوه الدفلى طارت لحشمة ..

لَحْيا وَصْفَا وَ نْقا ؤُ لَوْقََر

لا صغير تسقات بالخير اخلاقو....

ؤ لكبير ف الكَركَاع تلف ؤ هتر