The Poet's Library

شحال قدك

يا لْغافل ؤُ طَبْعك مْفَبْرك

هايِم عاري غادي

دافع كْبير وَلْجوف هاري

ما صَنْتي عَزًة...

وما لْبَستي قدًك

بلْ شادْ في لْعُرش الرًاشي

هازْ زعما شي حاجة فَياشي

عايِشْ لْوَهم لِ جلاك ؤ ما نفعك

ؤ باش تَغْلبْ هْوال الدنيا قْنَع

نْسى ذيك بَعْ وَبَعْبَع

شَدْ لْأَرْض فهي فراشك وسترك

حَوًطْ بَجْنابك ؤ شوف شحال راك غني

إيلا كنت بَقَرش لَحْلال قانع ما تْعاني

زاهد نْقي وَحْمد الله راه حَبًك

عْطاك لغالي ؤ لِ ما يَتْشرى بِمال

الصحة زينة السترة وراحة البال

وخا راس مالك غ نْعالة فَصون قَدْرك

زْمان قالو الطمع طاعون

مرض خبيت وتْلاوي فيه عَربون

تقضي لأَيام مَخْطوف...

ؤمال الدنيا ما يْقَدًك

فشحال قدك

وانت مْعلًق فين تْفَلق

فنوض وافهم الرسالة

شَدْ لأرض ما لك تَتْعالى

جْمَع لْوَقفة وتْحَرك

حيد النقص وذيك الرجفة

طَعْمك مَرْ سْليتي ولْخطفة

انتَ سيد راسك لا غيرك

فشحال قدك

كذب هنا وترهط لهيه

ضْحَك على هذا ولْآخر غْريه

دًاتك الغفلة وثْقال حَمْلك

بنادم ما تزينو غ فْعالو

لخير وصْفا ولوقر مَوًالو

ما عَجْبو راسو باسِل...

وبِمالو ما طْغى ما تْجَبر

شحال قدك

ؤ انت زعما الفاهم المثالي

كلشي عندك مَشْكل حيت حْيالي

راكب لكلخة ...

ؤ حلفتي ما تفيق ؤزاد جهلك

بل بغيتي حتى انت تعود عنتر

تدير المال ؤ على بنادم تْخَنتر

لْعين فيها خشبة...

والراس كُدْية مْحَجًر غ يْفَرْنَك

عجبك زْواق وَلَبْروتوكول

نْفاق وتْلاوي ولْقَلب مَسْلول

ما شدتي لجام...

والوهم قهرك

شحال قدك؟