15 دجنبر 2019
مول لقلم
مول لقلم...
باع شْواري ب لِ فيه ؤ م حشم
سَوًق بْلا بْلا ؤ لكذوب
حلف يزيد ف عماه ؤم يتوب
بَدًلْ مْدادو قسوة ،ؤُم حَنْ مَ رحم
غرر ف لقبة بذاك لمسكين
عاون على عراه ؤ طلاه ب طين
دوخو ب تشلهيب ؤ لْسان لحنين
ردوا مخلوق طايع حاني صنم
عَيْشو تالف جفنو بالحيرة لاوي
طارت لْبَسمة ؤراس لورد خاوي
فَقْدو الهمة ؤ غرقو ف الَهَم
مول لقلم باع ؤ شرى ف لْإنسان
ردو سلعة ؤ زاد غلا ثَمان
ذبح نُور ؤ لحال زاد عَبًسْ ؤ ظَلًمْ
مول لقلم دخل دْلالة وَ سَمسارة
رَخِصْ قيمتو ؤ ركع لمول شكارة
خان الحرف ؤ قتل لغنا ؤ نغم
مول لقلم خْتار ضيق ؤ لْجفلة
ركب على صرخة لفقير و لْغفلة
نسا الطيبة لمحبة رحمة ؤ لْعفة
ؤل رْماه ب جْهل لبارح...
صبح لْيوم عارف ؤ منو حْكَم
شبْعو نًاس من نفاقو ؤ كذوبو
تفضح ؤ بانت موسخة عيوبو
كالة ولاً ، ؤ م فاق م ندم
مول لقلم لصاحب المال تباع
بات مطيار ؤ ف لْجمع بعباع
عاون ظًالم ؤ وسخ لْجوف ؤ لقاع
بوق خداع صغير قزم
مول لقلم
الأديب والشاعر المغربي الأستاذ أحمد الكندودي
15 دجنبر 2019