The Poet's Courtyard

لمجذومة

يا لمجذومة

شكون حنا وشكون هما

زطمتي ؤ ما شاورتي

قهرتي لحر وبه لعبتي

راكبة على لكلخة مهدومة

زعرطات بغالك ؤ هاجت

على حق بنادم داست ؤ زادت

ها لغلا

والعيشة ذليلة مغمومة

فيا لمجذومة

قولي ك درتي ليها

واش غ على الخطفة بعتينا ورهنتيها

هي الهمة ؤ ما قلتي حشومة

واش معانا او مع عديانا

كَاع ما مسوقة منشطة لكَانة

لعب ونصب ونهب....

وجمع لكرمومة

ما خلتي قلم ولا صحة في راحتها

لحلال حرمتيه وعلى لمحبة خلاتها

تابعة ومتبوعة ...

وفي الغفلة مردومة

فيا لمجذومة

فيك قلنا لخير غدا يكثر وتزيان

نتحرر من النقص والظلم والطغيان

بقيتي على سنة لهي ؤغرر ...

وبلغة باك صاحبي وراقك مختومة

فقدتي السومة

فرق كبير بين لقرع ولعور

ل راس مالو تهرطيق وكثر

مقلوب عليه القفة ...

بهلوان الحال والحومة

فشكون حنا ...

وشكون هما

حتى تريب خيمة لمقهور

تشردوا وتطفي الأمل والنور

وهي غ عشة ...

بل فل مطمورة

يا لمجذومة

ياك وعدتي بالخير والرفاه

منك ما شنا غ المحنة والآه

ؤكملتيها بالكيدية والمساطير المسمومة

قالوا ملعونة

لا راحة لا هنا فاسدة مجنونة

تخلقتي غير باش تفرسي لغلة

عاد بنادم ساكنها لغمة

نفسية مريضة مصدومة

حدية وبومة

ما سولتي على لمعدوم واحوالو

سكنتي لعالي وتبندرتي بديالو

كنت طامة ....

لقهرة ولقلوب محمومة

فيا لمجذومة

خير لبلاد لولادها

هما هواها وبرها وسماها وعمادها

جبالها وسهولها وناسها المكلومة

راه جمع ولم عيب

شفرة هذيك وثقيب الجيب

هاميك غ راسك ...

والباقي لماء والشطابة ولكومة

فاش هاذ الترقاع والروينة

تبنذير والبندير ولغبينة

ؤ ما راعتي لقليل الحيلة والمعدومة

يا لمجوذمة

فيقي بلا منغاز

فكري في غدا والعكاز

راه ما تدي معاك غ كفن وشبر ...

ؤ ما زرعتي لأرض غ شر ولومة

زيني ملقاك مع الله ؤ قنعي

حلي ودنيك تقادي ؤ تجمعي

صوني حقوق ماليها ...

ومسحي بالخير لقلوب لمهمومة

يا لمجذومة

فشكون حنا...

وشكون هما