The Poet's Courtyard

لفراقشية

هما لفراقشية ...

داعوا

سكنوا كاع الرحابي

تاجرو في لخلق ...

شراو فيه ؤ باعو

وسخوا لأرض والتراب

جف بسبابهم الصفا ؤ لميزان عاب

طلاوه ظلم ؤ تهزم لحق واتباعو

داعوا

هما لفراقشية وسادوا

جمعوا السلطة ولمال ...

حوشو على لفرحة ولهنا والناس جاعو

لا مدرسة خلاو لا سبيطار

كلشي تخربق الفتنة والنار

عادوا اسياد الوقت وقطاعو

فين ما تحط اليد يلسعوك

هيمنوا على كلشي ومالهم فيه مشكوك

ركبوا جهالة الدايخ ...

فرعنوا وزاغوا

عادوا جزارة

نشروا العلة وزرعوا الشمكارة

نهب وغلي وهرب ...

كلها ؤ عكازتو لا ذراعو

لولاد ضاعوا

سرق بسمتهم شناق

لقح بنادم حقد ونفاق

لبيبان تسدات ولحال ظلم ...

غرق لمركب ؤ شراعو

الشناقة سنوا قوانين

حماتهم من الجزاء ملاعين

نتف نتف لا عفة لا لين

زادوا لمقهور قهرة...

بل عفطوا بثقلهم على وجاعو

لقاوها سايبة يا فلان

لا من يحاسب سلعة الجذام

دنسوا الحلم وتخلوض قاعو

عادوا صحاب لمقام والشان

حيت بالسحت شبع بوجعران

لا رفاه لا كفاف ...

بنذير مثقوب دوى وعلا صداعو

داعوا

هما الشناقة ولفراقشية

زيد عليهم الشلاهبية ولمرايقية

سرطان فقس حيرة ...

و لمجمك فرعن بمالو وباعو

ما راعو

ما قالوا عيب ولا حشومة

الخطفة واللهفة في جوفهم موشومة

لغدر عندهم ساهل ...

كرم الود وبسال نعناعو

هما لفراقشية داعوا

ل عندو فيل زادوه فيلة

ولاو عصابة نفوسهم عليلة

حاربوا الحق ولمعقول رخصو بياعو

فيا بلادي امتا يصفا لحال

يتسيقوا كروش لحرام وقتهم حال

تعود الفرحة ...

يتمعش الدرويش ويرتاح من وجاعو