The Poet's Courtyard

كون مسؤول

كون مسؤول

واعرف اش تتنطق...

واش تتخرج واش تتقول

بلسانك راك واكل الشوك

باين ولد غْرَيبة وذوك ؤ ذوك

تربية مارجة وداخلك معلول

بل راك معروف شكون انت

تريكة الخونة والنتفة عثة

مخلوق مرهط مزدوج غول

لخونة سابوا ؤ على مول لقلم شتفوا

قالوا ما شي وطني وبه سايرين يجفوا

ما صدقوا في الوعد وما صدقوا في القول

فكون مسؤول

عرف اش تتخرج واربط الدال بالمدلول

بل دير لذاك لسان السايب لجام

خمم ؤ وزن فلا زلة في كلام

ممنوع الهرطقة....

والرأي الناقص المخبول

ؤ بكري قالوا :

شي تعب على زادو...

ؤ شي بالبارد كالو

جمع وطوى ونفض ...

ؤ ما خلا كرموس وما خلا زعبول

قليل لأصول

دملة في طريق لحال

عاد لقمان وقارون وابو مال

عفط على بنادم ...

نهب حقو ؤ سالا لقول

فكون مسؤول

حسب خمسة ؤ تكمش

ؤ ل تلفتي سير قلب على من تنش

فاشل مع راسك...

وقُفلك مفوري مصدي مجهول

بل كون ناضي

في فك لوحايل ماضي

ماشي حاصل...

بين الهربة والنكير والفم محلول

ففكر قبل ما تنهق

دير حجتك وبها انطق

تمس وطتية اهل الحرف حشومة

زعما توسخ الصفة والخلق والصورة

رويبضة أفاك ؤ لحس مذلول

شموع لبلاد وضوها هاذوك

من اجل لحق هما لغادين يربوك

اهل العز ...

الصبر والتضحية والكفاح والمعقول

فكون مسؤول