The Poet's Library

لحق

تحت نعالتْ لباطل تْسحق

داروا به لمناشر

ها سًايَب ها دًاسر

ضاق لْويل وتخنق

لباطل نشر جناحو وفرفر

فقست بيوضو جُور ولْحق تقهر

صرخ ؤ ما نفعو صراخ ...

شد رُكنة وتَرهق

سًادي وتًراس صفًق

عجباتو صورْتو وَلِ وَهْمو تَيًق

باش مات في صْدور الصدق وغرق

مسكين مكسر جناحو ساير يْقاوم

طالب غ لْفَكة من صَنَم نكًار ظالم

ما عاد يخاف الله مْزنْدق

ما عْطى وْصِية ما صلح وْلاد

ما بنى حكمة شلاهبي فارغ كذاب

كسا لمعقول بجلد الذيب ...

زُور وبْهوت ولحال تْخربق

لباطل ب لبهوت حْما عصابتو

ضًرسة كْواها بحفنة مَن شكارتو

فازْ وخلًى لحق وسط لغفلة يْبَرْقق

تناسلو دُعاتو وتعفنت نْفوس

عاد الصًادق منبوذ لْغاه مَسوس

ؤ ما بقى فاش تشد وفاش تَيًق

لْحَق حْلف إيلا تراجع

وخا وحيد نَقُزْ كَاع لَمْواجع

دْعامْتو يقين والقران لِ بالحق نْطق

قال يتهز حتى يَعْيا هو لْباطل

يَعْلا فوق مَنو نْقي وصًادق لعاقل

واخا قلال...

بالصبر غدا يْفُك قيود لْمَسْخ لَمْعَتًق

ثارْ لْحَق باش يْصون حْقوقو

لْقى راسو منبوذ وصنع طريقو

ولعجب ما لقى حد صافي...

ولا ب لوفا مْسَوًق

لحق زعف عاد يندب وينين

ما حايطين به غ لْفاع وثًعابين

رْكب جناح الهربة ...

وشموسو طفات...

ؤ ما عادت تضوي ولا تشرق

حيت بنادم عاد دينو باطل

صفق وراهم كل مَكْري سافل

حْطب جهنم لِ فيها غدا يتحرق

غابت شمس الحق