The Poet's Library

مَن لغيران

خرجوا ذوك لفئران...

لِ ما بانوا سنين هاذي وأيام

مشغولين مساكين بجميع الحبة

خواو صنديقة ولات خربة

في لفريكو جمدوا ذاك لواجب ولمحبة

باش يْعَرسو عرس الذياب...

ويطنزوا على لهزيل نيشان

عطاو حتى ما قدروا يزيدو

للتربية لينا بغاو يعيدوا

قسموا لحصيصة وقالوا ...

عاود رغرت يا فلان

عنداك تعيق وتفيق

زوين هكا فضفاض بقى هبيل بريق

واسعة قشايتك ...

وحسن دَلْقش ذاك لسان

حنا الفيران

عاد خرجنا

في جحورنا عشعشنا

جا وقت زْعامة

واش تْفهمو بالخاطر اولا بالندامة

او وليتو خصمان الساسة وعديان ؟

حنا صحاب طْنز وبيع

في ايام الكهف شبعنا سحت وريع

شناقة وفراقشية ...

ل رهنوا لبلاد وخربوا لميزان

موسم لفيران هذا

وجوه النقرة والعملاء

ل خاصهم تسياق ...

ويعم لخير ويشبع الجيعان

بل تقدم لبلاد والراية تْعلي

يكثروا الصالحين ...

وبالمعقول يرجمو كل شيطان

فَخْبَط بالعدالة ذوك الفساد

ل هدموا لحلم وضيعوا لولاد

زرعوا اليأس

غ المفلس والأفلس

ل لقى السيبة...

تسيف وبغى يرجع سي السيد ؤ بلا بلان