The Poet's Library

باش غابو لجواد

كلشي غلا ؤ كلشي تزاد

راب حُمًار الخيمة

طيراتها لعجاجة وهي اصلا مهدمة

ثمر شوك الفاقة ؤ تقهروا لعباد

لهطة ولعناد

مول الشكارة كفر ما ينفق ما يعشي

جمع لحصيصة بالمكر ولحيالة ولفرشي

تقسح بنادم وتألم...

وهما على لكراسي دكَوا لوتاد

ؤ ذوك ل حسبناهم ولاد لجواد

شي رشا منهم ؤ شي داه لواد

قلبوا الفيستة عادوا لعابة

سكنهم لغش والطمع خطافة نصابة

في الهيئة يخلعوك ...

وهما شمايت ورماد

قتلوا لهنا والفرحة

وسعوا الطبقية وخا الصرخة

زرعوا سهول الرحمة دوم...

ؤكملوها بالتهميش ونكاد

ولبلاد

ردوها بزولة واكحة واخا دمها

ملكية خاصة ؤ كلها يدو فين مدها

السيبة وضاع فلانطي دم لاجداد

بنادم تلف ؤ في الغفلة دايخ غادي

حتى مول لقلم خان عاد طماع سادي

خان النقا والصفا والامانة ...

ؤ زاد خرب المعقول وضاعوا لحفاد

كلشي غلا ؤ تزاد

الدرويش ريبوا خربتو

جلحوه بين لحفاري كحالت عيشتو

كلها ؤ فقايسو ؤ كلها ؤ غدتو

ترنح المجحوم ؤعاد واحد من لاسياد

جمع الرياش والسلطة ولمال

عاد سي السيد ؤ ل بقى عبيد يا خال

فاش تدير مع جرو دسر وساد

ؤ باش قلالوا مالين الصدق والنية

عمرات لمسارب حناش وعقارب ؤ ولاد الدونية

لعقلية عامرة خش ورماد

لعبوا لعبة الصومعة والحجام

علقوا الصالح ولمعقول جلخوه جذام

ثقبوا جيب الكادح ...

قوم فرعون اتباع لوط وعاد

ذوك ل جمعوا كَاع لبلاوي

فقروا الحر قيدوه بالباطل والتلاوي

شبعوا نتيف ؤ قصاو ولد الناس الجاد

ما خلاو زريعة أصيلة ؤ ب لَمْحَرطنة بدلوها

ما تنبت ما تعطي غلة ولارض رهنوها

ذباحة لكَرنة ل ضرهم قِيحو سهاد

لا زين لا مجي بكري

ركبوا الجهالة ؤ طفاو حلم الشاب والدري

ؤفين ما حطتي يديك ...

يحرقك جمر ذوك لاوغاد

كلشي غلا ؤ تزاد

الجفلة والطجة والتنوعير

لا قمح بقى لا عدس لا شعير

عصابة خطف كُلاًب وجلاد

فيا بلادي منين سلطوا عليك هاذ الرعاوين

لِ ريبوا لعدالة وخنزهم طليهم حتى لودنين

ما ندموا ما قالوا حشومة ...

غْراق لمركب وحق عاشور داه لواد

ؤ ذاك سندباد

شحال مسكين حلم

شربوه من صغرو حنظل وعلقم

هاجر ؤ خوى لبلاد

ضاعت منو طقية لخفا

تْرَون لحال السرقة ولخطفة

نهب نهب الركزة والزدحة

ؤ سم السراق والغش سرى بين لعباد

كلشي غلا ؤ تزاد

فنوض يا الناعس طهر وسيق

أعداء لبلاد فيهم لا تيق لا تَيق

سرهم لحاويات سرطان على لعباد

غدا يبيضوا ويطليو الدنيا

ما يستاهلوا محنة طَلْيَتْهم طلية

ؤ عنداك من سماويهم ...

فيشريوك ب الرخا ...

تريكة الفساد

كلشي غلا...

وكلشي تزاد