2 شتنبر 2022
يا لغافل
يعتمد هذا الموقع على التعليق الصوتي الآلي. لذلك، قد يكون النطق غير دقيق في بعض الأحيان، وخصوصاً في الزجل المغربي.
يا لغافل
يا هذاك
هي الموت...
وراك وراك
ؤ فين ما مشيتي تابعاك
فحنا في الدنيا غ عابري سبيل
ساعتها م يعرفها غ لخالق لجليل
ففين لولين امك وباك
بل فين ذوك لجداد
لحباب ولخوت ولصحاب
كلهم عند الله ...
ؤ م بقى حد فيهم حداك
هي وراك وراك
فلا تغر وتسخر
م يغريك مال ف تْساوى ؤفكر
رسا ؤ ثبت معاي عفاك
فلا تغر ؤ تقول غادي نخلد
لعمر قصير ؤ ما دايم فيها حد
سوى الخالق ل خلقك وسواك
فنوض دير لخير ؤ صفي
كون سموح ؤ للشر طفي
م تبقى غ صورة و ذكرى
ؤ نهار عشاك يتشتت الجمع ...
ؤكلشي ينساك
صل وانحر
عيش نقي طاهر
خاف ربك واستغفر
غدا لقبر فراشك...
ؤ تراب غطاك
زمان لغفلة فيه ساهيين
غيرنا الزمان وليها سايرين
احسن للناس ...
زين مع الله ملقاك
م تنفعك فياشة ولا فخفخة
ذاك التكبر والكبر والعجرفة
ظنيتي راسك همة وابليس غواك
عاد دينك نزوة ورذيلة
ؤهو الحال زادك خبث ؤروينة
تجبرتي ؤ طغيتي
ؤنسيتي لموت ل تابعاك
بل هي وراك وراك
يا لغافل ميز فعالك ؤ غربلها
زرع لمحبة ؤصون بالطيب جدرها
حمد ربي واطيعوا ...
راك م تدي غ الصالحات معاك
الأديب والشاعر والزجال المغربي الأستاذ أحمد الكندودي
تعليقات القراء
جاري تحميل التعليقات...
شارك القصيدة
2 شتنبر 2022