The Poet's Library

طلًع النيفو

راكْ ولد الأسود

لوحْ مَنْ كَشوشَكْ كلْ منبوذ

حتى لْقبح والشر عيفو

كونْ ناضَجْ صالح

ما مسوس ما مالح

وسَطي ولَلْمَعقول رْديفو

حُلْ عينيك وتْفَجًج

فِي بْلادك ما تْعَيبْ ما تْعَوًج

عِيش راقي مْنَوًرْ ...

جَدًد فْعالك والخير صَرْفو

فِي خوك دير لَمرَوة وَهْزْ بيه

ما تخليه مَضْغَة لَلْحَرْنة ولغمًة تَكْويه

زين طبعَك ...

وفي لْغاك طَلًعْ النيفو

الطًيْش وَتْخَرْميز فُوتو

زْرَع لْأثَر باشْ لْحَبْق يضْمن قوتو

يعود دْفا وصْفا...

لِيد في ليد ضَدْ كلْ ديفو

طلٌع النيفو

عود بنادم حنين

في لَوْعود صادقْ امين

ما عدمي ما طماع ...

ومن لْوَسط شَدْ خْفيفو

خْدَم وَرْفَعْ لَعْلامْ وَتْقدًم

لْحَشمة وَلْخلق ولَوْقر فَافْهم

لا تخلي الغفلة يَتَجْليك...

تَديكْ مْواج لْقُبح وتْعود خَفو دَفو

بل صفي تشرب

لقناعة راس مال وفيها رْغب

عود مْأصًلْ...

فَزْمان على همتك لْعَدْيان بْغاوْ يْشَتْفو

طلع النيفو

زرع في كل رحبة رحمة

تخْضار سْهول وَتْنوًر لكَمرة ...

القلب دَربو عْلى سْماحة وظَرْفو

لكلمة لعايبة نساها

ما تنعلْ ؤ وزن ونظف مجراها

كُون مسؤول ...

والعايب لوحو راهْ شيطانو مْزَرْفو

طلًع النيفو