The Poet's Library

قالوا ناس لحكمة ولفضل

الزين زين الداخل...

ؤ بلا عقل ما يكمل

ما هو بِطول ولا قلدة

ما يعرض راسو رهينة في الشدة

رزانة وثبات ...

كامل وبالعفة مكمل

فسعدات الزين ل جمع لحيا والطيبة

ما غراتو غواية ولا توسخ ب عيبة

ديرو في ذراعك...

وعلى لهنا تفجج وطٌل

الزين النقي نسمة وحياة

خلق وصفا والحرة وْعات

فهمت غرايب الدنيا ...

واد لبهوت ل بالتلفة محمل

وهو الزين بلا عقل باب

ايلا كان بلا قفل ساب

ولبادي ولعادي يدهس ؤ ما يسول

ما همها وسخ لحال وزواقو

زمان لكذوب مظاهرو ونفاقو

قانعة والله نْصرها وليها كمل

الحشمة ولوقر والثقافة

شادة في الصح لا الخرافة

ما راكبة عليه ملاطي...

ما قاسها جهل

زير ما زاد الشايطة غير فضيحة

لحفاري والليل طلاعة هباطة قبيحة

جثة ملاوحة في الغبن والذل

وهو الزين تيحشم على زينو

ما يفرط ؤفي همتو لْوَسخي ما يهينو

صادقة ضاوية...

والجوف ب النقا مْكلل

الزين السايب عيبوبة

فيه ينقش وينحت مولا نوبة

شي يبيع فيه ويشري ...

ؤ شي حش حلاوتو بالمنجل

السراب اصاحبي لا تجري وراه

راه خاسر راسو وغباه جلاه

عاد نكرة...

وعليه لا تعول

رخص راسو ؤ هانوه اللعابة

صحاب غربل وخش لغابة والصيادة

لا زين بقى...

لا خلق لا وقر في المجمل

وبكري قالوا اهل لمروة ولفضل

الزين زين لعقل

ما هو لباس ...

ولا صباغة ولا هيكل

الزين عقل