The Poet's Library

نقي وغربل

نقي وغربل

زريعة دودات

ايام الخير مشات

والمخ الملهي على لوضع كمل

لا تعول

على هذا او ذاك

حفر الساس وعنداك عنداك

من مخلوق ردوا الريال مصندل

غرق في نهب وهرب

ما خلى غ الحشلاف وخرب

غدا يتقلب عليك ...

حيت جينة غريبة عقلو مبلبل

بكري قالوا اياك من الجايع ايلا شبع

ما يعود يحن ما يخاف الله ما يركع

بحال البندير ايلا تجلد ...

ضار وبصداعو يعود حنش مجلجل

فسبحان من خلق هاذ الماركة الميتة

ما حمدوا الله ما قنعوا عادوا نكته

لي جا يشتم ويلعن ...

وغدا تلقاه مهان عند الله مجرتل

نقي وغربل

شوف كاع جنابك

جدد وحظي حتى من خيالك

فشر ما خلق الله...

معمرين لمكان دايرين عصابة ومحفل

بل موجدين لمحمل

النية لمخربقة ردت لبلاد غابة

استعباد الدرويش وحدهم السادة الغلًابة

اسياد زعما ...

وهما شفارة نصابة كذابة بالمجمل

نقي وغربل

عنداك من دعاة لجهل قلال الغيرة

صحاب لمصلحة الخاصة والضربة لكبيرة

هرسو لقلم لي به ناس بنات...

باعوا لبلاد حيت لقطيع مغفل

بل دايخ الزغبي بكثرة لمطارق

ما ذاق راحة وطعامو فتات حارق

جمعوا لحصيصة ...

وفي الظلمة ربطوا لعقول بالتغرير والسلاسل

نقي وغربل

بالمحبة ولعناية تكسب قلوب الناس

طهر نفسك من الأنا والظن الوسواس

زرع لخير ...

ولوسخ حلوا الحاويات وللرحمة ما يستاهل

نقي وغربل