The Poet's Library

ل م يعرفش قدرك

تبان لو صغير ؤ يحقرك

او يبيعك بالرخى للرخيص

يتلون عليك بسبع وجوه نحيس

ؤساهل يرهنك ؤ يغدرك

حيت راضع من بزولة الرعاوين

موسخ عقلو مثقوب بالخبث سنين

ؤحيت فاقد الشي م يعطيه...

يرفعك ؤ ينصبك ؤ يخبطك

ل م يعرفش قدرك

سكنو الحلقة الفارغة ؤ سد عليه

هو جحا زمانو بعدوا عليك ؤ لهيه

عكازتو لسانو ؤ م يسوى فرنك

م تصفي معاه نية

عنداك ديرو خليل ؤ هو حدية

ؤ ب لحيالة يمضغك ؤ يغرك

منو دير البال

رفاقتو كذوب ؤ حيال ؤ محال

ؤ الكلب المشرار يعضك يعضك

م تجاوبو م تكثر معاه قيل ؤ قال

تغابى ؤ تقن الدور بان بهلوان

ؤمرة مرة دير راسك هبيل ؤ فرنك

ف ل م عرفش قدرك

جامي بالصدق ؤ لمحبة يداويك

بالتمثيل والتنوعير يمثل عليك

داير فيها معلم ؤ هو عقلو مجمك

ل م يعرفش قدرك

م يحترمك لا في بعدك ولا قربك

دينو مكر ؤ بهوت ؤتحرميات

م تقول غير حرباء بكل الصفات

تبان لو صغير يهينك ؤ يغدرك

بل يديرك طريق ؤقنطرة

يحفر ليك بنيابو الف حفرة

ؤيتقن الدور ؤعليك يزعرط

هذاك ايامو سلات ؤمحسومة

زمانو نكاد ريحتو عفنة مسمومة

و اطلب الله تزول شوكتو...

ؤمنو يحفظك

ل م يعرفش قدرك