The Poet's Library

غ خَطفيه

يا ذيك لحنينة...

وهُرْبي بيه

راح طاح في طينةَ مَكَعور

شي مرفوع شي مكسور

وَجْلاخة سايرة تْمَرْمد فيه

غ بَعْديه

على طريق لهدارة

لَهْبيلة ل بالبصمة نكارة

ما كفاها نْقا وهْنا ...

ولوسخ عاجَبْها تغرق فيه

شديه

ؤ على حضنك لحنين حُطيه

عالجيه من ندوبو وداويه

راه ما يستاهل طِيط ولا تْشَنشيط

صادق وخًا غلبتو حيلة زنديق

بل من لعوافي وحرقة لحال خلصيه

عظميه وبغيه

قدريه وصونيه

ول ما عرف قدر رْجال ....

خلي لايام تْوَريه

كوني ليه عمارة

نَسيه في ذيك لهنكارة النكارة

علميه ك يصفي يشرب...

وفي وْعودو صدقيه

غ خُذيه

راه عويد لخيزران

جلخوه بقايا بنادم بالعدوان

بغاوه حرير شايط ...

يغسل لْواني ويْجفو به

نخوة ولهمة طبيعتو

ما يحب غدر ولا تَصلْتو

أصيل مأصل ....

والله يجيب ل تخطفو وتديه

لهيه

فين كاين لخير وماليه

فكوني لو صدر حنين

صفا والنية واليقين

ومن قيود لهم فُكيه

غ خطفيه

ايلا كنتي لالة ومالي

لوفا والصدق بلا تلاوي

حتى ايلا كان مهرس...

جبري كسرو وبنيه

بل كوني ليه حبيبة

وفي لحلال ديري يدك في يديه

غ خطفيه