1 فبراير 2022
باك صاحبي
يعتمد هذا الموقع على التعليق الصوتي الآلي. لذلك، قد يكون النطق غير دقيق في بعض الأحيان، وخصوصاً في الزجل المغربي.
باك صاحبي
حرام ي لخو تريب ؤتهدم
بجهلك ؤنقصك عزة بلادي
حلفتي م تفكر م تخمم
خاوي غير مكَدم ؤغادي
ما خفت من الجاية فتندم
او تحاسبك محكمة اعدادي
راكب عليه ملاطي ؤمصمم
فاسد كذاب ؤكلشي عندك عادي
منين ي بلادي تسلطو هاذ الردم
ؤمنين خرجوا هاذ الاعادي
واش لميزان مال ؤجهم
ؤكفتو تصدات أ سيادي
إمتى تبزغ شمس لحق والهمم
ينور الزهر ؤيحلى نشادي
وامتى تهز القوم لغيرة ؤتلم
ؤ بالمحبة والصفا تتمد الايادي
وامتى تسالي لغة ذهن والهم
باك صاحبي ؤ كرباج جلادي
طيور هربت خلعها الغد لمظلم
عيات م تصيح ؤم تنادي
ؤ طيور كساها اليأس والغم
خيبو ظنها ذوك فسادي
سايبة لقتيها فزيد نتف ؤغنم
غدا يفجر الحال ؤيطلع ميلادي
فالرجوع لله ي ذاك الصنم
فيق راك م زدت الا سهادي
حرام ركوب لموجة ب لعدم
ب التغرير ؤ تصفيق الأيادي
ؤحرام يورث الكرسي طماع بالدرهم
أو ينوب علي واحد شفار سادي
فأش هاذ الطينة وهاذ الصم
ؤ واش هاذ الظلم البادي
ففوقاش ي بلادي المضرور ينعم
ؤ تضوي نجوم لأرض سعادي
فعيدي نصرة الحق ف خدم
تسود لعدالة ؤتهز راية جدادي
فباركة من ل داسو لحق ؤلقلم
ردوا الجهل سلعة ؤباعو ولادي
ؤباركة من السراق والدون والهم
باك صاحبي ل هدمت دراع حفادي
حرام ي لخو تريب ؤتهدم
بجهلك ؤنقصك عزة بلادي
الزجال والشاعر:
المغرب
الأديب والشاعر والزجال المغربي الأستاذ أحمد الكندودي
تعليقات القراء
جاري تحميل التعليقات...
شارك القصيدة
القصيدة السابقة
هم سماسرة الحروفالقصيدة اللاحقة
دابا ترجع الفرحة1 فبراير 2022