The Poet's Library

آش هذا...

الخطافة والشناقة

لمناشر واكلة سراقة

عمروا القبة

الغبرة والحبة

لا نيفو لا شهادة

بل عادوا أئمة ف الفقهية

دارو لبنادم تبيخا هما لمْرايقية

ردوا كلشي مقلوب...

ولعباد في الفوضى والفتنة غادة

آش هذا

نصبوا شفار على الميزان

ردوه حاكم وانتهى الأمن والإيمان

باش يحمي عصابة البلداء

لعجب هذا

لغابة سابت ؤعمروها الحطابة

النتافة والشناقة والهوادة

مرروا قوانين طنز

نهب بالعلالي الدسارة والفز

كَيْلوا مال السحت ولحرام...

ؤ ولاو زعما شان وسادة

وحسابهم...

الماء والشطابة

غرقوا بنادم في الضيم

قلوب لحجر لا خلق ولا دين

نهبوا الغلة ومول الفيلة زادوه فيل يا سادة

عاونوهم شماكرية وجوه النقرة

الهندام ولقلدة راس مالهم شفرة

مجرمون بالطابع خاصهم الرباط والعدالة

او خاصهم محكمة الشعب

المضرور ولي عليه لص تلهى ونْصب

في الحاويات بلاصتو...

مقامو هذا

آش هذا

زمان الرويبضة والمهزلة

الضبوعة ولاو سبوعة

لخامج حارب نقاء بالميوعة

عادت لبلاد مارستان لهبال ولعضادة

كبرها تصغار دينهم

داروا لبنادم لجام ولعساسة فينهم

غرقوا في سوق الدلالة ؤ فقدوا الهالة

آش هذا

والى متى هاذ الذل

لحقرة وكلها ودراعو شفر وتسل

جمكوا لعقول

بنادم غ غادي عايش مذلول مهبول

ردوه بردعة ورفادة

بل علموه التصفيق

عنزل قهروه بالضيق

تطلات لبلاد جهالة

سادت الأمية وتعفنت الحالة

الشباب غرقوه ف البطالة

قتلوا فيه لحلم والريادة

طج هارب من بلاد الشناقة والحصادة

آش هذا...؟

*** الشاعر والزجال: أحمد الكندودي *** المغرب ***