The Poet's Library

وْجه الطراح

والكلب النباح

ما حشم ما تاب

دار جذورو وساب

ولى من كبار الشلاهبية سلاخ

سفاح

قطًع للهاوية

داتو فعالو الدونية

اليوم راه راجع ...

باقي ما شْبع تَمْياح

مسخرة وهو في الخلق يحطب

لقى لمرتع وعلى لجاهل رْكب

باع وشرى في النخوة ...

وفي الجوقة قزم بَسبع رواح

حلف ايلا راح

شادينو رجال لقبة

لكرويلة والمجانية والحبة

ؤ على لكرسي ساير يرشوي

يمَرق ويشوي

مفضوح مقصدر ...

ؤ سَرو في لْبركاسة يتلاح

الجهل والأمية

سياسة سمسر ودموع البوحاطية

يتقاتل ويمثل على قطيع داتو التبعية

ينال البركة من ل اختار الفاقة...

ويترفح هو ترفاح

وحيت قلبو مات

دجن بنادم بالهضرة ولخزعبلات

استغل ضْعيف وصبغ ايامو نواح

جراح

هرس ذراعو

زاد وْجاعو

مرغو في الذل والحكَرة ...

وبحقو عاد من لْاسياد يا صاح

وهو غ شلاهبي

وجه الطراح قوالبي

سلعتو خوى في خوى ...

زعما من دعاة الخير والصلاح

وهو ل ريب باش يسود

نهب وسرق وخطف وخان لوعود

بالنعلة ودعوة لمظلوم ربي مسخو ...

لْهاهْ وما هَمو لِ جاع وناح

وجه الطراح تْشعبط على لحويطة

تعلم يهيت ويرقص حتى على العيطة

زايد في هبالو

هو والأصنام ل بْحالو

وسرو لحساب ويتلاح

بل يرجع يبني بلادو ذاك الحر

تعود الفرحة والحق يظهر

ووجه الطراح يتلاح

خاصو عامرة في خاوية

فشوف وسط لحضرة ك كِصورتو لاوية

غِ بيادقو ولمرايقية والزرقة راس مال وفتاح

فبَعد ألْحُر من تجار لغفلة

لِما نتجو ما عطاو شعير ولا غلة

ؤ وشوف الأصيل ...

ل همو لبلاد لا التمياح