The Poet's Library

صَفي تَشْرُب

صفي يَ بنادم تشرَب

نظفْ ب لْخير ؤ لَمْحبًة...

ذاك لَعْقل والراي لَمْثقًبْ

فَكًر فِ بلادك

كْسيها بِ لَمحنًة راها ع ْمادَكْ

خُوذ بِيَد ْ خوك ؤُ طَبْطِب

فيق ؤُ قْبَل مَ تخَطفك لأيام ...

تْولي غريب ؤُمَ تَسْوى كلام

غَرًاتك الأنا وَ لْفاضي

سَنًك مْكَشِرْ ف لْعَيبْ ماضي

دًاخْلك منهوك. ..

عامَر خُبث ؤُ شْطَب

اه يا تُربة لحبيبة

تْشَتات جْماعة ؤ مَ بْقات طيبة

سَيْجُوها بِالنار ؤُ زْرَب

ؤُ باشْ مَ قَدًتْهم لَغْبينة

زادوا لَحْجَر ف لْعافية حْطَب

اه، ... يا لأرضْ لَحْنينة

اه، ... من النغمة لحزينة

لا رحمة بقات ، ؤ ُ فاَض جْرَب

اَشْ هاذْ دُنيا ْ نْثينة ...

واش هاذ المنكر ؤ لَعْجَب ؟

فَصَفي يَ بنادم تَشْرَب

ؤُلِ شَتيه باغي يتْعلم عليك تْبَوْرِيدَة

عرَف أَنً أصْلو قْصَب ؤ خْشب

صْفا وَ لْخير مَ يتْباعُو بِ ثَمان

سَوًلْ حَكمة لمجدوب ؤ ناس زمان

سَوًل الحرف واللوح والقلب

ؤ عوض تْفكر تَزْرَع السوس

زْرَع لَمْحَبًة ؤُ جَرًِب

سْقيها بِ صْفا والنية

بلا زواق وَلا نْفاقْ لْحية

ؤ مَنْ مُولْ سبع وْجوه لا تْقَرًب

ؤ مَنْ مُول سبع وْجوه لا تْقَرب

ناس حال ؤ أحْوال

هذا غير غادي ، لا بال لا خيال

ؤ هذا زاد فيه زاغ ؤ مَال

ؤ هذا طارت مَنْ وَجْهو الحشمة ...

لَبْسُوا لَمْسَخْ ، نْسى أصْلو ؤ تْغَرب

فصفي يَ بنادم تَشرب

مالك شيطان وليتي تَنهْب ؤُ تَكذب

مَ قلتِي حْشومة ؤُ مَ خُفْتِ من الرَب

بارَكة من مْضيغ لْهضرة

راه لقلوب مكوية ب جمرة

الفردانية وَلاَت دين ؤُ نبرة

بلغة راسي يَ راسي تْكَسْرَت الْجَرًة

مَاتت لَمْحبَة ؤُ تْجَوًف لْقلب

فصَفي ي بْنادم تَشْرب