The Poet's Library

لبس قدك يواتيك...

ؤُ مَ تْعلِقْ فينْ تْفَلِق

رزقك يأتيك يأتيك

حْمَدْ الله ؤُ قْنع ؤ من لْغد لا تقلق

قاد خطواتك تْقاد ؤ زيد

كون بطل القلب حديد

جامي تًحْنى لي بك م مْسوق

لْخبز لفطير ؤ لْماء يكفيك

عزة النفس هي ل تواتيك

م تطمع م تْمَد يِدْ ؤ تْخَلق

شْحال مْن غني عايش فقير

حسن منو لقانع وخا لحصير

زادو الريال عْذاب ؤ في الزور يْلَفِق

فَ لْبَس اصاحبي قدك يواتيك

ؤلا تعلق فين تفلق

واحد مريض بالفشفشة ؤ دفوع كبير

نقصو ردو ثرثار ويحقر الغير

انتحر طبقيا ؤهو م عندو ما يْمَرق

م رضى بِحال ؤلاح هْلو لَهبيل

الناس في الناس وهو مشنق طويل

نْكر حسبو نسى أصلو عاد مْجَلْوَق

عزة النفس لا تنساها ف تدوز عليك

يولي لي ليك ما هو ليك

طَرْف من النخوة همة ؤ بها ما تْسَوِق

م تركع لمول المال م تْبان صغير

يدوسك حيت فاقد لحس والله كبير

اليوم ليك ؤ غدا عليه فابحث ؤ حقق

الدنيا دوًارة ؤ ما يدوم حال

بالأعمال الصالحة لا بمال لحرام

قرا ؤ تعلم وْعى رقًع م تْفرق

مول المال كرشو كبيرة يهرف عليك

يستعبدك وسير وأجي يطنز فيك

ؤ م يعطيك حتى يعرفك ذليل مْعَتق

بِ رْيالو ضْمَن السلطة ؤ الطَمًاع سلومو

شحال من حزار فقد سومو

ؤ باش تمكن ؤ علا خلاه في لحفرة معلق

حُطْ رجليك على الأرض عيش بسيط

لا تفوح لا تكذب

دير دينك تواضع وحب

ؤ بالصدق بوح م تنمق م تزوق

م دير كساك مفخرة ؤ بالنضج تْسلح

نبش في الصخر وجيبها وانت مصحصح

ف زواق يطير أبلادي ...

ؤ في الغفلة تبقى غافل مْشَنق

فالبس قدك اصاحبي يواتيك

احمد الله فهو وحدو من للأرزاق يْفرق

هذا ابتلاه فاغناه ؤ باش م قنع جلاه

نساه في الجاية ولغوات وراه

بل عماه قْساح قلبو م حن م صدق

فيا لهبيل قوتك هي تْشد بالله

يعطيك ؤ ينور طريقك ؤ م يفرط

لبس قدك يواتيك

ؤما تعلق فين تفلق

*** الزجال والشاعر: أحمد الكندودي *** المغرب ***