23 ماي 2026
خليه يبعبع
يعتمد هذا الموقع على التعليق الصوتي الآلي. لذلك، قد يكون النطق غير دقيق في بعض الأحيان، وخصوصاً في الزجل المغربي.
يا لمصنكَع
يا ودي خليه يبعبع
ما تحس بنقص ولا ذنب
راه الشناق شتف ولعب
عدتي رخص من ذاك والو ...
ؤ لعجب هاز غمتو ومصدع
شادَك التيكوك
زعما شعيرة وانت موعوك
ربي ما قال : عاونوا جبار صعصع
بل لا يكلف الله نفسا إلا وسعها
لعادة منها عنداك تتعادى ...
لكن حلفتي إيلا تفيق وخا موجع
لغليظ كلشي بالفابور ليه واصل
ولهزيل غرقو فراقشي عاد مقجوج حاصل
سرط لغلة وكملها ب بَعبع
خليه يبعبع
لا تنهك راسك وخوك
جارك في عارك والمهلوك
بعت النخوة ...
ومدتي ليد حيت مضبع
فكر لغدا واش غادي يطرا
ما تلقى حمراء ولا خضرة
لغلا ولغلا ولفاسد يسخر منك مجمع
كلهم عادوا سماسرية وتجار
لقبة سوق ضْهَد والرابح نكار
غلب ؤ ما عف...
مجرم وفي التخلويض ضالع مضلع
خليه يبعبع
يعم الرخص ويعيش درويش
راها الوسطى ما قدرت ما لقلت باش تعيش
بورجوازية بريالها زاطمة ...
خنقت لبلاد وغدا تبيعها للغريب وانت تفركَع
حاربها حصادة لخير وشرور
مصاصو الدماء راهم ردونا اموات وقبور
وخا جاهلية القرابين سلات زمان ...
فأش تدير يا لهبيل لمكربع
خليه يبعبع
ولذاك لمفتي بلكذوب والزور ...
لا تيق لا تصدق لا تسمع
خليه يبعبع
الأديب والشاعر والزجال المغربي الأستاذ أحمد الكندودي
تعليقات القراء
جاري تحميل التعليقات...
شارك القصيدة
القصيدة السابقة
صمت وانبطاح 2القصيدة اللاحقة
زعم سراق الأفراح23 ماي 2026